第16回人工言語コンペの感想 lon toki pona

こんにちは。ンソピハです。
今回は第16回人工言語コンペの感想を書こうと思います。
どんなふうに書こうかなあと考えていたのですが、ふと「全文トキポナで書いたら前代未聞でおもろいんじゃね」と思ったので、その線で今から書きます。
人工言語のコンテストなのですから、自然言語じゃなくて人工言語で品評すべきなのですよ（？？？）

あとで日本語訳します。数時間〜数日お待ちください。（どれくらい早く書けるかは筆者の気分次第。）
ちなみに、言語名のトキポナ化はilo pi ante nimiを一部参考にしました。どう表記していいか分からん音がけっこうあったもので……笑

toki a! mi n Sopika.
ni li tenpo pi pana pi toki pali lon tenpo #16 (第16回人工言語コンペ). jan mute li pali e toki sin! lipu ni la mi wile toki e ni: toki ale ona li pona seme a li musi seme a!
tenpo ni la jan ale li pali e toki ni: ona li jo e kalama nasa. kalama ni li seme? a, mi wile toki e nasin pi pana kalama. nanpa wan la jan li pana e monsi pi palisa uta ona tawa monsi uta ona, sama kalama [k]. nanpa tu la jan li pali e pini lon sinpin uta. jan li open e pini ni pi sinpin uta, la... a! ona li kalama e kalama ni! sitelen Apije (IPA) la kalama li ni: ʘ, ǀ, ǃ, ǂ, ǁ. toki pona en toki ante mute li jo ala e kalama ni. taso musi la toki ante la ona li ken nasa ala. toki Ta la nimi mute li open lon kalama ni!
mi kama wile toki e ijo pi kalama ni lon tenpo kama lon lipu ni, la mi kepeken nimi ni: kalama pi pini monsi pi open sinpin. tan li ni: jan li kalama e ni la ona li pini e monsi uta, li open e sinpin uta.

toki Sami (Sanmisna)

lipu ni li toki e ijo ona. ona li tan jan Ata Kotowama (言浜有体).
(ona li jan, anu seme? a, mi sona ala e nimi open pi jan pi pali toki la mi kepeken nimi 'jan' lon lipu ni.)
jan sitelen li toki e ni: sona pi toki ni li tan lipu pi sin ala mute! ona li musi kute anu seme a~
jan pi toki Sami li tan lupa nasa. ni kin li musi a.
nasin toki kin li musi. toki pona la jan li toki sama ni: mi pali e lupa. ante la toki Sami la jan li toki sama ni: "mi jo e lupa. lon lupa la pali li lon." musi a, anu seme?
sitelen en kalama kin li nasa.
sitelen la ona li kepeken sitelen <ʞ>. kalama ona li [qʼ]. wawa.
kalama la toki ni li jo ala e kalama pi nasin ni: jan li poka lili e ijo tawa ijo lon uta sama kalama /j, w, l/ pi toki pona. suwi a. kulupu kalama li ken pini lon kalama 4 taso ni: n[Ṽ], s[s], r[V˞], h[h]. kalama [V˞] kin li nasa li lon ala toki mute, la ni li musi a!

toki Inli pi tenpo sike #2226

lipu ni li toki e ijo ona. ona li tan jan Len.
lipu ni li pona tawa lukin, li musi.
mi kin la toki pi tenpo kama li musi mute a! tenpo pini la mi pali e toki mute pi tenpo kama... ona mute li tan toki Nijon. taso, toki ni pi jan Len li tan toki Inli. toki Inli li kama seme...? a, musi!
lon la, toki Inli li kama ante mute. taso sina lukin e toki ni la sina ken kama sona e ni: nimi mute ona li sama toki Inli. ni li musi wawa.
ona kin li jo e kalama pi pini monsi pi open sinpin. toki Inli li kama jo e ona la ni li suwi kute a a a. nimi September li kama nimi /seʘeŋ͡ʘe/ a!
lon la kalama li kama ante lon nasin pona. pilin mi la nasin mute pi kama ante pi toki ni li nasa ala. kalama pi pini monsi pi open sinpin li kama lon, taso nasin kama ni kin li nasa ala tawa mi. taso, mi pilin nasa tan ni wan taso: kulupu kalama li kama ken ala pini lon kalama pi pini uta. mi lukin e lipu nimi pi toki ni la mi pilin e ni: toki pi open uta li kama mute mute a! ni li nasa musi tawa mi a.
nimi ona la nimi byautifuo li suwi nanpa wan tawa lukin mi. ona li tan nimi beautiful pi toki Inli pi tenpo ni.

toki pi monsuta ko Lawin (スライムさん)

lipu ni li toki e ijo ona.
monsuta ko Lawin li pana ala e nasin kalama, e nasin toki, e nimi pi toki sin ni. ona li toki e ijo ni taso: toki sama ni li lon la ni li ken musi. mi pilin pona tan toki ona ni. toki musi pi ma pi tenpo kama li pona a lon tenpo ale!
monsuta ko Lawin li toki e ni: jan li ken pana e lipu lili kin sama lipu ni lon tenpo pi pana pi toki pali. toki ni kin li pona tawa mi.

toki Mosan

lipu ni li toki e ijo ona. ona li tan jan Tasukin Mawisontolu (舞孫弗たつきん。).
a... mi pakala! mi sona ala e kalama /ʩ/! open la mi sona lili e ijo pi sitelen Etapa (extIPA). a ken la mi o alasa e nasin kalama ona... mi open e ilo Jutu. n n n... sona, mi sona. ni li musi a.
toki ni li jo e kalama nasa mute. mi ken ala kama sona kalama e ona ale, taso mi kama sona e ona lili. lipu ni li pana e sona sin tawa mi a, pona!
sitelen la sitelen <ḷ> li nasa nanpa wan tawa mi. ona li kalama /ʔ/. toki ante kin li kepeken sitelen <ḷ> tawa kalama sama? ... a, mi sona ala.

toki Topu Tanki

lipu ni li toki e ijo ona. ona li tan jan Kamelija (かめりぁ).
(mi toki pona e nimi ona la mi kepeken tenpo suuuli tan ni: mi sona ala e nasin kalama pi toki ni a! toki Topu Tanki la nimi ona li ni: труовру чóмгpы [k͡¡ʌʙu k͡ǃɶmʀɨ]).
mu, sona nanpa li nasa mute tawa lawa mi...
taso mi pilin e ni: toki ni li musi.
jan San pi ma ko Sala (الصحراء الكبرى) a! ni li musi mute a. lon, ijo lili li ante lon tenpo pini la ken la jan San li tawa ma ko Sala kin...!
lipu ni li toki e ni: toki Kanse li ante e nasin kalama pi toki Topu Tanki. toki Topu Tanki pi tenpo pini la kalama pi open uta li mute. taso toki Kanse li weka mute e kalama pi open uta la toki Topu Tanki kin li weka mute e kalama ni... ni li nasa tawa mi. toki mute pi ma Apika li kama ma jo pi ma Kanse. taso ona mute li jo e kalama mute pi open uta lon tenpo ni kin. tan seme la toki Topu Tanki taso li ante? —mi sona ala. ni li musi.
sitelen kin li musi. ona li kepeken sitelen Kililisa! toki ante ni li lon ala lon: ona li kepeken sitelen Kililisa lon ma Apika? ni li nasa musi a.
nasin toki pi toki ni li musi mute a. toki mute la ijo li jo e selo mute sama ni: toki Nijon la nimi |ik-| (tawa) li kama ante tan tenpo. tawa li lon tenpo pini la ona li 行った. tawa li lon tenpo ante (tenpo ni anu tenpo kama) la ona li 行く. tenpo li sama telo, taso jan li kipisi e ona kepeken kon nimi kepeken nasin toki. kipisi ni li nasa ala lon toki ale. taso, nasa la, nasin toki pi toki Topu Tanki la kipisi li weka! nasin Kawikijo (核硬文) en nasin Siko (室浩文) en (梦核文) li jo ala e selo. ni li sama linja kule sewi. linja kule la jan li toki e ni: ona li jo e kule luka wan anu kule luka tu anu kule pi nanpa ante. taso lon la kule ale li jo ala e selo. sama la, nasin Kawikijo en nasin Siko en nasin Mukawi li jo ala e selo. —nasa musi a!

toki Sawapa

lipu ni li toki e ijo ona. ona li tan n Sopika—mi a a a.
pali pi toki ni li ike e lawa mi! tenpo pini la mi pana e lipu ala tawa tenpo pana pi toki pali. mi pali e toki sin tawa tenpo pana lon tenpo nanpa wan. mi pilin nasa mute...
tan tenpo pini weka la mi pali e toki pali mute. taso ona ale li tawa mi taso. mi pana ala e ona mute tawa lukin pi jan ante. tenpo la mi pana lukin e ona lili, taso ona kin li toki pi mi taso. jan toki li mi taso lon tenpo mute. taso a, tenpo ni la mi pali e toki pi ma pi lon ala. jan toki li mi ala, li jan mute pi lon ala. ni li nasa tawa mi. mi sona ala e ni: mi ken pali e ni lon nasin seme? tan ni la lipu mi li kama lili a... XP

toki Alutapono

lipu ni li toki e ijo ona. ona li tan jan Kojukijuko (降雨急行).
lipu ni la toki suli pi tenpo pini li lon. jan li pilin musi tan utala ma pi tenpo pini weka, la lipu ni li ken musi suli tawa ona!
ike la ante toki pi toki pi tenpo pini li pini ala. taso ni kin li pona suwi.
sitelen toki ona li wawa lukin tawa mi! mi pilin pona tan ni a.
kalama ona li lili. kalama pi pini uta li 14 taso. toki pi kalama lili li pona tawa mi la mi pilin pona tan ni kin. kalama pi open uta la kalama /e/ li lon ala. taso kalama /o/ li lon a. nasin ni li musi tawa mi.
nasin kepeken pi kalama /ǃ/ li musi a. ken la ona li sama kalama /N/ sama kalama /Q/ pi toki Nijon anu seme...?
lipu nimi pi toki ni kin li musi tawa mi. kon pi nimi arutiru li musi a. mi lukin e ona la mi kama wile kepeken nimi ni lon toki Nijon kin a a a. nimi banugidu en nimi honurdu kin li pona. mi lukin e nimi ni la mi pilin e ni: ni li toki pi ma ante...
ante pi nimi dano pi nimi hatyda a li musi mute a. nimi pi ante lili sama ni li pana e pilin musi pona lon tenpo ale.
nimi hatari li jo e kon pona. ni kin li pona tawa mi. suno li wawa a.
nimi napyuri li jo e kon nimi pi musi mute. kon pi ijo jan li kama tan kon 'mun' anu seme...? tenpo ale la mi pilin pona lon tenpo ni: mi lukin e ni lon nimi lipu: nimi li kama jo e kon nimi sin!
lipu nimi ni li jo e nimi mute ni: ona li toki namako e pona jan. ni li musi a tawa mi.

toki Okama

lipu ni li toki e ijo ona. ona li tan jan Nijanako 06 (Nianago06).
少数精鋭 (kulupu pi jan lili wawa)...?
n...
a, toki ni la ni li ken ante e nimi: kalama li sewi anu anpa! ni li musi a. tenpo pini la mi pilin ike tan nasin ni tan ni: mi sona pona ala e nasin ni. taso mi kama sona la tenpo ni la ona li pona mute a tawa mi.
toki ni li kepeken sitelen pi toki Nijon a. ni kin li pona tawa mi. tenpo pini la mi kin li pali e toki mute kepeken sitelen pi toki Nijon...

toki Namu

lipu ni li toki e ijo ona. ona li tan jan Itoli (糸利).
a nasin kalama pi toki ni kin la sewi anu anpa li suli. musi a.
kalama pi pini monsi pi open sinpin li musi lon toki ni. musi nanpa wan tawa mi la kalama pi kon tawa (sama kalama /s/ pi toki pona) li ken lon sinpin pi kalama pi pini monsi pi open sinpin. ni li pona a. kalama ni li lon ala toki Kosan (Khoisan languages) anu seme?
a lipu ni li pana e sona mute pi toki ni! pali wawa a.
nimi ijo li jo e kulupu a! ni li pona. —toki Elopa mute kin la ona li lon. sama nimi meli, sama nimi mije. toki Elopa mute la kulupu li lili. taso toki ni la kulupu li mute pona a.
kipisi lili nimi li mute. jan sitelen li pana e sona mute pi ijo ni. mi pilin e ni: ni li lipu pona sona. toki pi nimi pali tawa li musi nanpa wan tawa mi. mi wile kepeken kipisi nimi -xűgxűllä lon toki Nijon kin lon tenpo ni: mi tawa kepeken ilo tawa linja!
a, jan sitelen li kama sona e ijo pi toki mute lon tenpo pali pi toki ni... sina wawa a!

toki Kakalin

lipu ni li toki e ijo ona. ona li tan jan Sawan (炒飯).
jan lawa li len e ijo sewi, li toki ala e ijo ona tawa jan anpa... ni li nasa musi a. mi kama wile sona e ni: nasin sewi pi jan anpa pi ma ni li seme a.
ken la jan pi ma ni Kosu (hosu) la kalama pi pini monsi pi open sinpin li pana e pilin sewi tawa jan. mi pilin pona tan ni: jan li pana e kon tawa kalama.

toki On

lipu ni li toki e ijo ona. ona li tan jan Jamise.
(nimi ona lon li "ƻ͡ʗ̼ʰ̬̪͆ʌ̃ r̼". seme a...? toki pona la nimi ona li kama 'On' anu seme...? mi sona ala.)
kalama... kalama... kalama mute mute mute a!
toki pi ijo pi sijelo jan li musi. jan pi toki On li lon mun ante anu seme...? mi sona ala. taso mi pilin musi tan ni: mi sona e ijo ala pi ma ni!
mi wile kute e ni: jan li kalama e nimi pi toki ni. ken la... jan pi mun ma pi mi mute li ken ala ni anu seme?

toki Ketamino

lipu ni li toki e ijo ona. ona li tan jan Kijano.
kalama pi pini monsi pi open sinpin li lon ma Elena!!! wawa a.
tawa tenpo li weka e sona pi toki ni... ni li nasin a. kipisi sona li kama e pilin musi tawa mi.
ijo li mute la kalama kin li kama mute... (kepeken kipisi nimi "CaC-" anu nimi "VjV-".) nasin ni li pona a tawa mi. toki pali mi kin li sama ni :)

toki pini

aaa mi kepeken tenpo suli tawa lipu ni! taso mi pilin pona. jan mute li pali e toki musi mute a~